Muqdisho,(insidesomalia.org)-Warar dheeraad ah ayaa ka soo baxaya qarax xoogan oo saaka lala beegsaday Kolonyo Ciidamada Booliska lagu soo tababaray Dalka Itoobiya la socdeen, kaasi oo ku soo jeeday Magaalada Muqdisho.

Wararka ayaa sheegaya in qarax lala helay mid ka mid ah Kolonyada Ciidamadaas, kaas oo uu saarnaa Taliyaha Ciidamada Booliska ee lagu soo tababaray Dalka Itoobiya.

Sarkaalka halkaasi ku geeriyooday waxaa uu ahaa Gaashaanle dhexe oo Ciidamada ah iyadoona sanadihii ugu danbeeyay uu ku howlanaa arrimaha booliska xukuumadda Federaalka Somaliya iyo tababaradooda.

Sida ay sheegayaan ilo wareedyo sarkaalka qaraxaas ku dhintay ayaa magaciisa lagu sheegay Axmed Kaniis oo sida la sheegay gaariga uu saarnaa uu baabi'iyay qaraxa Miinada ee lala helay.

Ciidamada dhowaan lagu soo tababaray Dalka Itoobiya ayaa isugu jiray Milateri iyo Boolis oo mudooyinkan dhaq dhaqaaqyo ka waday Gobolada Dalka, iyadoona intii ay ku soo jeedeen Caasimada ay wadada u galayeen Kooxaha Kacdoonka ka wada Soomaaliya.